ငွေလဲလျှင် စာရွက်ပြစရာမလိုတော့ပါ

(၁-၂-၂၀၁၂) မှစတင်ပြီး အာရှစိမ်းလန်းမှုဖွံ့ဖြိုးရေးဘဏ်လီမိတက်၏ မည်သည့် ငွေလဲကောင်တာ (Money Changer)တွင်မဆို အမေရိကန်ဒေါ်လာ ၁၀၀၀၀ နှင့်ညီမျှသော အမေရိကန်ဒေါ်လာ၊ စင်္ကာပူဒေါ်လာ၊ ယူရိုငွေကြေးများကို မည်သည့်စာရွက်စာတမ်းမျှ တင်ပြစရာမလိုဘဲ လွတ်လပ်စွာ လဲလှယ်နိုင်ပြီဖြစ်ပါကြောင်း သတင်းကောင်းပါးအပ်ပါတယ်။

ယခင်က ငွေလဲကောင်တာများတွင် ငွေလဲလှယ်လိုလျှင် နိုင်ငံခြားသားဖြစ်ပါက ပတ်စ်ပို့ပြရခြင်း၊ ဒေါ်လာ ၂၀၀၀ ကျော်ပါက အကောက်ခွန်ကြေငြာလွှာတင်ပြရခြင်း၊ မြန်မာနိုင်ငံသားဖြစ်ပါက နိုင်ငံခြားငွေရရှိရာ ငွေဝင်ရင်းမြစ်ကို တင်ပြရခြင်း၊ ၀ယ်ယူခြင်းဖြစ်ပါက မည်သည့်ကိစ္စများတွင် အသုံးပြုမည်ဟု သက်သေတင်ပြရခြင်းများ ရှိခဲ့ပါတယ်။ ယခုအခါမှာ ၄င်းစာရွက်စာတမ်း တင်ပြရခြင်းများကို အမေရိကန်ဒေါ်လာတစ်သောင်းတန်ဖိုးအထိ ပြုလုပ်ရန်မလိုအပ်တော့ဟု မြန်မာနိုင်ငံတော်ဗဟိုဘဏ်မှ ညွှန်ကြားချက်ဖြင့် ဖြေလျှော့ပေးခဲ့ပါသဖြင့် ယခုကဲ့သို့ အများပြည်သူသို့ ၀န်ဆောင်မှုကောင်းတစ်ခုအဖြစ် ဆောင်ရွက်ပေးနိုင်ခြင်းဖြစ်ပါတယ်။

ငွေလဲကောင်တာများ၏ ဈေးနှုန်းသတ်မှတ်မှုကို သိမ်ဖြူကောင်တာမှ အဓိကသတ်မှတ်ပြီး ၄င်းဈေးအပေါ်တွင် သတ်မှတ်ထားသော ရာခိုင်နှုန်းအလိုက် ကျန်ကောင်တာများက ဈေးအတင်အချပြုလုပ်ခွင့်လည်း ခွင့်ပြုထားပြီဖြစ်သဖြင့် အမေရိကန်ဒေါ်လာဈေးနှုန်းတွင် ပြင်ပပေါက်ဈေးနှင့် အနီးစပ်ဆုံးတူညီသော ဈေးနှုန်းများဖြင့်လည်း အများပြည်သူတို့ လဲလှယ်နိုင်တော့မည်ဖြစ်ပါတယ်။ ကျန်ငွေကြေးများ၏ ပြင်ပပေါက်ဈေးသည် နိုင်ငံတကာငွေလဲဈေးနှုန်းနှင့် မဟုတ်ဘဲ မြန်မာနိုင်ငံဈေးကွက်၏ ဈေးနှုန်းပေါ်မူတည် တွက်ချက်မှုရှိနေသေးသဖြင့် ကောင်တာဈေးများနှင့် ပြင်ပပေါက်ဈေးများသည် အနည်းငယ်ကွာဟမှု ရှိနေပါသေးတယ်။ များမကြာမီကာလတွင် ၄င်းကွာဟမှုများကိုပါ သိမ်ဖြူကောင်တာမှ ညှိနှိုင်းတွက်ချက်ကာ သတ်မှတ်ပေးလိမ့်မည်ဟု မျှော်လင့်မိပါတယ်။

အာရှစိမ်းလန်းမှုဖွံ့ဖြိုးရေးဘဏ်သည် ရန်ကုန်မြို့ ဆူးလေဘုရားလမ်းပေါ်ရှိ မြန်မာ့ရှောပင်းမော(Myanmar Shopping Mall)၊ ပြည်လမ်း လှည်းတန်းမီးပွိုင့်အနီးရှိ ကမာရွတ်ဘဏ်ခွဲ(EA, Espace Avenir Serviced Apartment)၊ ရန်ကုန်အပြည်ပြည်ဆိုင်ရာလေဆိပ်( ဆိုက်ရောက်၊ ထွက်ခွာ)နှင့် မန္တလေး အပြည်ပြည်ဆိုင်ရာလေဆိပ် (ဆိုက်ရောက်) တို့တွင် ငွေလဲကောင်တာများကို ဖွင့်လှစ်လဲလှယ် ပေးလျက် ရှိပါတယ်။

မကြာမီ နေပြည်တော်အပြည်ပြည်ဆိုင်ရာလေဆိပ်နှင့် ပုဂံညောင်ဦးတွင်လည်း ငွေလဲကောင်တာများ ဆက်လက်ဖွင့်လှစ်ရန် ပြင်ဆင်လျက် ရှိပါသည်။